Congress party aṭangin Sajjan Kumar a bang

Kum 1984-a Sikh mite tualvuakna thleng chungchang thubuaia thiam loh chantir leh damchhung tang tura hrem, Sajjan Kumar chuan nimin khan Congress party member a nihna aṭanga banna a thehlut. Sajjan Kumar hi Thawhṭanni khan Delhi High Court chuan damchhung tang turin a hrem a ni.

Nimin khan Sajjan Kumar chuan Congress party president Rahul Gandhi hnenah lehkha thawnin, Delhi High Court-in a thubuaiah thiam loh a chantir avangin Indian National Congress party member a nihna aṭanga a ban thu a ziak.

High Court-a Justice S Muralidhar leh Justice Vinod Goel awmna bench chuan kum 1984 November thlaa Delhi leh hmun danga Sikh mite tualvuakna nasa tak thleng chu mihring taka pawikhawihna lian tak a ni tih sawiin, he thil thleng hian hun rei tak chhung mipuite rilru pawh a la nghawng dawn a ni, a ti. Kumar hi December 31-ah thuneitute kuta inpe tura hriattir a ni a, hemi hma hian Delhi chhuahsan lo turin tih a ni bawk.