Cyclone Phethai-in AP-ah chhiatna thlen nasa

Andhra Pradesh-a East Godavari district chu Thawhṭanni khan cyclone Phethai in a nuai a, thil tam tak a tichhia.

State official-te chuan Chief Minister Chandrababu Naidu hnenah thlipui tleh hian ram hectare 14,000-a zaua thlai chinte a tichhia niin an hriattir. CM hian Thawhṭanni zan khan review meeting hi a ko nghal a, he meeting-ah hian official-te chuan thlipui tleh hian thlai tam tak a tihchhiat bakah, thlipui tlehin chhiatna a thlenah hian beram 300 an thi a, electric ban 379 a tlu bawk niin an sawi.

Thlipui tleh vang hian East Godavari district-a cheng mi 5,000 chuang chu relief camp-ah sawnchhuah an ni a, National Disaster Response Force (NDRF), State Disaster Response Force (SDRF) leh naval helicopter-te chu thlipui tuarte ṭanpui hna thawk tur hian inrin tir reng an ni bawk. Thlipui tleh hian ruahtui a keng avangin ruah nasa tak a sur zui bawk a, Thawhṭannia Andhra Pradesh-a ruah tui tla hi 160 mm a tling pha a ni.