Pakistan-in jail aṭangin Hamid Ansari chhuah

Pakistan sorkar chuan enthlatua puha a man, India mi Hamid Ansari chu kum thum chhung jail-a a tantir hnuah chhuahin, nimin khan Wagah border-ah India kutah a hlan.

Kum 33 mi, Ansari hi Pakistan chuan dan loa an rama lut leh Indian spy niin a puh a, Pakistan sorkar beihna thilah inhnamhnawih leh, document lem siamahte puhin jail-ah a khung a ni.

Pakistan intelligence agency chuan kum ruk kalta khan Ansari hi an man a, kum 2015 December 15 khan military court chuan thiam loh chantirin Peshwar Central Jail-ah kum thum tang turin dah a ni. A tan hnu hi December 15 khan a zo tawh a, mahse a document-te peihfel a nih mai loh vangin chhuah mai a ni lo.

Kar kalta Ningani khan Peshawar High Court chuan Pakistan sorkar hnenah Ansari hi India rama thawn haw a nih theihna turin thil ṭulte buaipui tura hriattirin, thla khat hun a pe a ni. Ansari hi Thawhṭanni khan jail aṭanga chhuah niin, Islamabad-ah sawn a ni. Nimin tlai khan Wagah border-ah India kutah an hlan ta a ni.