ED-in Chidambaram-a thu zawt fiah

Congress senior leader leh union finance minister hlui P Chidambaram chu nimin khan INX Media case chungchangah Enforcement Directorate-in thu a zawtfiah.

INX Media-in foreign fund a dawn theihna tura clearance pek a nih chungchangah hetihlaia finance minister P Chidambaram-a thuneihna chu a fapa, Karti Chidambaram chuan a hlawkna turin a hmang

ṭangkai nia puh a ni. ED hian Karti-a hi thu an zawtfiah tawh bawk a, a thil neih cheng vaibelchhe 54 chu khawih chet theih lohin an hreksak tawh bawk.

Kum 73 mi, Chidambaram hi cheng vaibelchhe 3,500 hu Aircel-Maxis dela leh cheng vaibelchhe 305 hu INX Media case-ah hian investigating agency hrang hrangte chuan an chhuizui mek a ni. Heng venture pahnihte hnenah hian UPA-I sorkar lai khan Foreign Investment Promotion Board (FIPB) aṭangin clearance pek an ni.

Enforcement Directorte leh CBI chuan Chidambaram-a fapa, Karti-an FIPB aṭanga clearance a hmuh theih dan hi an chhui mek a ni. Agency chuan INX Media hnena clearance pek a nih danah thil fel tawk lo a awm nia sawiin, police First Information Report tlukpui Enforcement Case Information Report (ECIR) pawh an ziaklut tawh tawh a, hetah hian Karti Chidambaram, INX Media leh a neitu hlui Peter leh Indrani Mukherjee-te hming ziahlan a ni.

Kumin February thla khan CBI chuan INX Media tana clearance a hmuhsak theih nan Karti hi sum tam tak laah puhin an lo man tawh a, mahse bail-in chhuahtir leh nghal a ni.