Account tinah Rs nuai 15 dah a la ni ngei dawn : Minister

Union minister of state for Social Justice and Empowerment Ramdas Athawale chuan kum 2014 Lok Sabha inthlanpui neih dawna BJP-in bank account tina cheng nuai 15 dahsak an lo tiam chungchangah, heng pawisate hi account tinah hian dah luh hun a la awm ngei dawn a, mahse ṭum khatah tih vek theih a ni lo, a ti.

2014 inthlanpui neih dawn khan BJP prime minister canidate Narendra Modi-an ram pawn lama sum chheprelhte laklet a nih chuan ramchhung mipuite chuan an account-ah cheng nuai 15 an nei thei vek ang tih a lo sawi tawh a, hei bakah hian sorkarna an chan chuan ni 100 chhung black money-te laklet an nih tur thu a sawi bawk. Hengte hi tun thlenga tihhlawhtlin a la nih loh avang hian he a thusawi hi eptu party, Congress leh party dangte chuan BJP leh PM Modi-a beih let nan an hmang zui reng a ni.

Tunhnai state assembly inthlana BJP-in state pathuma Congress party an hneh zawh loh chungchang pawh sawichhuakin Athawale chuan , "Congress chuan state tlemteah hnehna an chang ve a ni ringawt a, nakkum Lok Sabha inthlanpuiah chuan kan hneh leh ngei dawn a ni. Narendra Modi bawk Prime Minister a ni leh dawn a ni", a ti.