Delhi HC in Sajjan Kumar ngenna hnawlsak

Delhi High Court chuan 1984 anti-Sikh riot case-a thiam loh chantira damchhung tang tura hrem, Sajjin Kumar-an thuneitute kuta inpek hun tur pawh sei sak tura a ngenna chu nimin khan a hnawlsak.

Sajjan Kumar hremna tur hi tihchhuah a nih hnuah kumin December 31-a thuneitute kuta inpe nghal turin hriattir a ni a, hemi hma chu Delhi pawh chhuahsan lo tura hrilh a ni bawk. Ningani khan Kumar hian hun pek belh turin Court-ah hian ngenna a thlen a, mahse nimin khan court chuan hun pawhsei sak a ṭulna chhan an hriat loh thu sawiin a ngenna hi a hnawlsak a ni.

Delhi Court chuan Sikh hnam tualvuakna thleng kaihhnawih thila Kumar-a laka thubuai dang thehluh pawh a la ngaituah leh dawn. A thubuai pahnihna hi Central Bureau of Investigation (CBI) in Nanavati Commission rawtna siam behchhana a thehluh a ni.

Kumar-a a thubuai pakhatna, thiam loh chantir a nihnaah Indian Penal Code hnuaia tualthah, inphiarruk, Sikh laka tharum thawhna chawk chhuak thei zawnga miputie fuihpawrh, in leh thil tihchhiat tuma che leh sakhaw hmun pawimawhte tibawrhbangah puhnaah thiam loh chantir a ni.

Thiam loh chantir a nih hnuah Sajjan Kumar hi Congress party aṭangin a bang zui nghal a, party president Rahul Gandhi hnenah a banna hi a thehlut.