Sorkarin Pakistan thusawi pawm lo

Pakistan sorkarin Mumbai-a Jinnah House neitu nia a inchhal chu sorkar laipui chuan a hnawl a, he hmun hi India ta a ni, a ti.

External Affairs Ministry thupuangtu Raveesh Kumar chuan Pakistan chuan he hmun chung-changah hian sawi tur engmah a nei lo. India sorkar ta a ni a, cheiṭhat pawh tum mek a ni, tiin a sawi.

Mumbai-a Malabar Hill-a Jinnah House hi architect Claude Batley-in European style-a a design a ni a, kum 1930 chho khan Pakistan founder Mohammad Ali Jinnah a cheng ṭhin. Pakistan chuan he in hi an kuta pe turin a lo phut fo tawh a ni.

Kumar chuan Jinnah House hi Hyderabad House anga hman chhoh dan tur a ngaihtuah mek tih a sawi. Sorkar laipui chuan Hyderabad House hi ramdang palaite meeting neihpui leh an puala lawmna siamna hmun atante a hmang ṭhin.

Pakistan hian tunhnaiah Jinnah House hi Pakistan ta a ni a, India-in he building hi a thuneihna hnuaia dah a tum chu eng kawng maha an pawm loh tur thu a sawi a ni. India ngei pawhin Pakistan ta a ni tih a lo pawm thlap tawh a ni tiin Pakistan Forign Office thupuangtu Mohammad Faisal chuan a sawi.

Kum 2007 khan Jinnah-a fanu, Dina Wadia chuan Bombay High Court-a Jinnah rokhawmtu awmchhun anih avangin he in hi a kuta hlan turin a lo ngen tawh a, a thih hnuah a fapa leh Wadia Group chairman Nusli Neville Wadi chuan rokhawmtu nihna hi a dil chhunzawm ve leh a ni. Mahse Kumar chuan he in hi tupawhin dil mah se India sorkar ta a ni, a ti.