Sohrabuddin case : Court-in mi 22-te thiam chantir

Special CBI court chuan kum 2205-a gangster Sohrabuddin Sheikh beihna lem, fake case-a inhnamhnawiha puh mi 22-te chu an puhna finfiahna tur a awm lo nia sawiin nimin khan thiam a chantir.

Kum 2005 November thlaa firfiak pawl nena inzawmna neia puh, gangster Sheikh beihna lem nia sawiah hian mi 22-te chu inhnamhnawiha puhin thubuai siamsak an ni a, an zinga a tam zawk hi Gujarat leh Rajasthan police-te an ni. Sheikh-a nupui Kausar Bi pawh a pasal kahhlum a nih thla vek hian thah a ni a, Sheikh-a thawhpui Tulsiram Prajapati chu kum 2006 December thla khan Gujarat leh Rajasthan police-te nen an inkahnaah kahhlum a ni ve leh bawk.

Sheikh-a unaupa, Rubabudin chuan kum 2005 December thla khan Chief Justice of India hnenah ngenna thlenin a unaupa thah a nih dan chu chhui chiang turin a ngen. Surpeme court chuan Sheikh leh a nupui thah an nih dan hi chhui chiang turin Gujarat police-te chu a hriattir zui a ni.

Kum 2006, December thla khan journalist Prashant Dayal chuan Sheikh thah a nih chungchanga police-ten inbeihna thleng nia an sawi chu a lem a ni tih police zurui pakhatin a sawichhuah thu sawiin, chanchinbu-ah a chhuah zui bawk.

Sheikh fake case ngaihtuah a nih chhung hian thuhretu 210 koh an ni hman a, tun thla tir khan Supreme Court chuan ngaihtuah zoin nimin khan court thutlukna chu puan a ni ta a ni.