Army chief thar tur Lt Gen Manor Pande

Lieutenant General Manoj Pande chu nimin khan Chief of Army Staff atana ruat a ni a, May 1-a chawl tur General M M Naravane a thlak ang.

Vice Chief of Army Staff ni lai, Lt General Pande hi Corps of Engineers-a officer zinga Chief of Army Staff ni thei hmasa ber a ni dawn a ni.

Indian Army chuan an twitter-ah Chief of Army Staff 29-na turin Lt Gen Manoj Pande ruat a nih thu leh, an lawmpuina thu an ziak.

National Defence Academy chhuak, Lt Gen Pande hi kum 1982, December thla khan Corps of Engineers (Bombay Sappers)-ah a lut a ni. Kum 2001-02 a Parliament beih a nih avanga India-Pakistan inep hnua Operation Parakram neihah pawh khan a tel a, Jammu and Kashmir-a Pallanwala Sector-a Line of Control-ah 117 Engineer Regiment a ho tih Army thuchhuah chuan a tarlang.

Pande hi sipaiah kum 39 ṭang tawhin, beihpui thlaknaah pawh chanvo pawimawh tak tak a lo chelh tawh a, western theatre-a operation neihah engineers brigade a ho a, strike corps-ah pawh telin, J&K-a LoC-a infrantry brigade a ho tawh bawk a, western Ladakh-a high altitude area-ah mountain division-ah tel tawhin, Eastern Command-a insurgency operation area leh Line of Actual Control (LAC)-ahte a lo awm tawh bawk.

Kum 2020, June aṭanga May, 2021 khan Andaman & Nicobar Command (CINCAN)-ah commander-in-chief a ni a; June, 2021 aṭanga January, 2022 khan Eastern Command-ah General Officer Commanding-in-Chief niin, February 1 aṭang khan Vice Chief of Army Staff-ah dah a ni.