UP-ah phalna nei loin sakhaw thila punkhawmna neih khap a ni : CM

State ṭhenkhata festival hmanna buaina leh tharum thawhnate a thlen hnuin, Uttar Pradesh chief minister Yogi Adityanath chuan an state chhunga thuneitute phalna loa sakhaw thila punkhawmna neih khap a ni tih sawiin, loudspeaker pawh midangte harsatna thlen tur zawnga hman tur a ni lo, a ti.

Eid festival leh Akshaya Tritiya te a lo thlen hnaih tawh avang leh, festival dang pawh a lo thlen zel dawn avangin Adityanath chuan police-te chu inralring renga an awm a ṭul tih a sawi.

"Loudspeaker kan hmang a nih pawhin, kan compound pawn lamah tihchhuah tur a ni lo. Keimahni avangin midangte harsatna an tawk tur a ni lo," tiin, sakhaw thila punkhawmna siam turte chuan boruak ṭha leh muanawm tak hnuaiah an kalpui dawn tih tarlanna affidavit an la vek tur a ni, a ti bawk. Sakhaw hrang hrangten a hma aṭanga an lo tihdan phung ang ṭhinah chauh phalna hi pek a ni dawn a, programme thar siamahte chuan phalna hi pek a ni tawh lo ang, tiin CM chuan a sawi a ni.

Kar liamta Inrinni khan Hanuman Jayanti lawmna neihnaah Delhi-ah buaina a chhuak a, hei bakah hian tun hnaiah Madhya Pradesh, Jharkhand, Gujarat leh West Bengal-ahte Ram Navami puala rally buatsaihah buaina a lo chhuak hlawm bawk.