Jahangirpuri buainaa mawhphurtua puhte Delhi police kutah awm

Delhi police-te chuan kar liam ta Inrinni zana Delhi hmar thlang lam, Jahagirpuri hmuna pawl pahnih inkara buaina chhuaka mawhphurtua puh mi pahnih, Ansar leh Aslam-te chu an kutah an awm mek tih an sawi. Buaina chhuak zel tur venthawn thilah Jahagirpuri C-block ah venhimna pawh tihkhauh a ni bawk.

Police-te chuan buaina chhuak chungchangah Ansar leh Aslam-te chu thu zawhfiah mek an nih thu sawiin, ministry of home affairs-ah detailed report thehlutin, he thil thleng chungchanga mante leh thil thlen dan chhui chiangtu tur team din a nih thute an tarlang. Hei bakah hian punkhawmna tura phalna pek leh phalna pek duhloh te, buaina chhuak kaihhnawihna kum tling lo man chungchangte an tarlang a ni.

Buaina chhuak chung­changah hian Ansar chu ama ruahmanna nge, midang thupeka ti a nih thu zawh a ni bawk. Aslam hnena silai petu nia sawi pawh a hming sawichhuah a ni bawk a, police-ten an man tawh bawk a, nimin khan court-ah kalpui nghal a ni.

Police department-a crime branch-a team 20-te chuan Jahagirpuri a buaina chhuaka inhnamnawih leh mawhphurtu dangte manchhuah ngei tumin video footage-te uluk takin an zirchiang mek a ni. He buaina chhuak kaihhnawihah hian Delhi police-te chuan mi 24 an man tawh a, an zingah hian hmeichhia pakhat leh kum tling lo pahnih an tel. Delhi Police Commissioner Rakesh Asthana chuan eng dinhmun, hnam leh sakhua pawh ni se, buaina chhuaka mawhphurtute chu an phu ang hremna pek an ni dawn a ni, a ti.

Delhi-a Hanumam Jayanti rally neihnaa buaina chhuak mi pakua an hliam a, an zinga pariat chu police mi leh sa an ni. Police-te chuan phalna nei loa punkhawmna siam vang hian Vishva Hindu Parishad (VHP) leh Bajrang Dal-te lakah thubuai an ziak lut tawh bawk.