Hnam hla play laiin J&K Governor chhuak tau

Jammu and Kashmir assembly-ah eptu member-te buaina siama an aubuai reng vangin, Governor NN Vohra chuan a thusawi a tihtawi a ngaih phah a, hei bakah hian hnam hla play laiin house aṭangin a chhuak tau.

J&K budget session hi nimin aṭang khan ṭan a ni a, inkhawm ṭana Governor a lo luh veleh eptu pawl, National Conference, Congress, CPI(M) leh independent MLA-te chuan thuziakte kengin an lungawi lohna an lo lantir nghal a ni.

Governor-in thu a sawi laiin eptu member-te hian lo tibuaiin, an lo au bengchheng a, thu sawi pawh ṭum thum zet a chawlh phah. Hemi hnuah hnam hla play a nih hnuah pawh eptu MLA-te chu an au bengchheng zui zel avangin Governor Vohra hi a chhuak ta a ni.

He thil thlen hnu hian J&K-a ṭangrual sorkar siamtu zinga mi, BJP chuan eptute chu thupha chawi turin an phut. BJP chuan Congress president Sonia Gandhi leh vice president Rahul Gandhi-te chu an party member-ten hnam hla zah lohna an lantir chungchangah an ngaihdan te sawichhuak turin an phut bawk.

BJP MLA Ravinder Raina chuan, “He thil thleng hi a zahthlak hle. Jammu and Kashmir-a hnam hla zah lohna lantir a nih ṭum khatna a ni. Assembly-ah pawh hemi chungchang hi kan sawi­chhuak leh ngei dawn a, eptu party-te pawh an chetdan chungchang hi an sawifiah kan phut dawn a ni”, a ti. Eptu MLA-te chu politics lamah pawh tawnhriat nei ṭha tak tak an ni a, hetianga session bul ṭanna aṭanga an chet mai chuan session tluana an chet dan tur pawh hriatthiam a har dawn hle a ni tiin sorkar thupuangtu, PDP Minister Naeem Akhter pawhin a sawi bawk.

Eptu party-te hian thil dang sawiho hmain, nikuma Kashmir Valley-a thla nga chhung zet tualchhung buaina thleng chungchang te, buaina chhuak avanga police-te silai hmehpuaha civil mi 100 chuang an thih phah chungchangte sawiho hmasak phawt an phut a ni.

National Conference hotu, Ali Mohammad Sagar chuan, “House-ah hian Kashmir-a hun rei tak tualchhung buaina chungchang te, inenkawlna dik tawk loh vanga harsatna leh chhiatna thlengah tunge mawhphurtu tihte sawiho phawt kan phut a ni”, a ti.