Delhi-ah face mask vuah tura thupek tichhuak ; Thupek zawm lote Rs 500 chawi tir an ni dawn

Hri lengin ziaawm lam a pan avanga hun eng emaw chen Covid khuahkhirhna hrang hrangte thlahdul a nih hnuah, Delhi khawpuia hri kai an pun thar leh avangin nimin khan Delhi Disaster Management Authority (DDMA) chuan face mask vuahna tur thupek a tichhuak thar leh.

Delhi Lt governor hoa meeting neihah he thutlukna hi siamin, nimin khan thupek hi tihchhuah leh nghal a ni. Khawpui chhunga pawn chhuahnaah face mask chu vuah leh vek tura tih niin, dan zawm lote chu Rs 500 chawitir an nih tur thu DDMA chuan a sawi.

Delhi health minister Satyendar Jain chuan khawpui chhungah hri kai pung thar leh mah se, chiaina tur a awm lotih a sawi. Hri kai thar zingah damdawi-in panpui ngai an tlem hle a, hei bakah hian hri leng dinhmun chu sorkar chuan uluk takin a thlithlai reng a ni, a ti.

Hri kai hmuh chhuah hi Delhi leh National Capital Region (NCR)-a an pun leh tak avangin, an ṭhenawm state-te pawhin district eng emaw zatah face mask hmanna tur thupek hi an tichhuak thar ve leh bawk.

Hri kai thar 2,000 an chuang
India ram pumah Thawhlehni khan Covid-19 hri kai thar mi 2,067 an awm a, tun kar chhunga ni khata hri kai thar 2,000 an tlin ṭum hnihna a ni. Hri kai thar hi Thawhṭanni aiin 66% in an tam zawk. Delhi khawpui bikah hri kai thar hi 632 an awm a ni.

Thawhlehni khan hripui vang hian mi 40 thih belh lehin, India rama Covid-19 vanga thi chhinchhiah tawh chu 5,22,006 an tling tawh.

Hri kai mek, active case pawh 12,340 niin, ni sarih chhungin 1,470 in an pung. Nitina hri kai thar, daily positivity rate hi ni riat hnuah a letin a sang tawh a, nimin khan 0.44% a ni tawh. April 12 khan positivity rate hi 0.21% a ni. Weekly positivity rate pawh 0.38% a ni leh tawh bawk.

Ram dang nena ngaihtuahin hri kai thar pung dan hi a la ziaawm hle a, mahse expert-te chuan ngaihṭha a, inthlahdah mai a thiang lo tih sawiin, Covid kaihhruaina dan siamte chu ṭha taka zawm chhunzawm turin mipuite an chah.