Jahangirpuri-a demolition drive SC-in a tihtawp tir

Delhi-a kar liam Inrinnia pawl pahnih inkara buaina chhuahna hmun, Jahangirpuri biala demolition drive neih chu nimin khan Supreme Court chuan a tihtawp tir.

Jahangirpuri biala dawr leh structure dangte bulldozer hmanga eng emaw zat tihchhiat an nih hnuah, Supreme Court chuan he thil thleng chungchanga petition thehluh anih hnuah a tihtawp tir a, vawiinah hearing neih a ni ang.

Court thupek tihchhuah hnuah pawh thil tihchhiat hi chhunzawm a ni tho a, North Delhi Municipal Corporation mayor Raja Iqbal Singh chuan thupek hi an la hmu lo a, hei vang hian dan loa structure dinte chu an tichhe zel dawn tih a sawi. Excavator hmangin mosque gate leh a bula dawrte chu tihchhiat a ni.

Delhi BJP chief Adesh Gupta-a'n mayor hnenah, buaina chawkchhuaktuten dan loa structure an dinte chu enfiah a, tichhe tura ngenna a siam hnuah demolition drive hi neih nia sawi a ni. Dan leh thupek kengkawh tura police ṭhahnem tak an duty chungin, mosque chhehvela dawr leh thildang awmte tichhe tur hian nimin zing khan bulldozer pakua tirh an ni. Mayor chuan hei hi a hma pawha an lo tih tawh dan a nih thu a sawi na a, BJP hotu ngenna thlen hnu lawka hma an lak avangin he thilah hian politics inhnamhnawiha puhna ri pawh a lian nghal hle. Jahangirpuri biala chengte chuan thuneituten demolition drive an neih dawn hian hriattirna engmah pek lawk an ni lo tih an sawi.

Kar liam ta Inrinnia buaina chhuak kaihhnawihah khan mi 25 man an ni tawh a, an zingah panga chu National Security Act (NSA) hnuaiah thubuai siamsak an ni.