AYUSH therapy la duh, ram dang mite tan special visa siam tum a ni : PM Modi

Prime minister Narendra Modi chuan ram dang mi, India rama AYUSH therapy la tura rawn zin duhte tan bik special AYUSH visa siam tum a nih thu nimin khan a sawi.

PM Modi hian nimin khan Gandhinagar, Gujarat-a Mahatma Mandir-ah Global Ayush Investment and Innovation Summit, ni thum awh tur a hawng a ni. He hunah hian World Health Organisation (WHO) Director General Dr Tedros Ghebreyesus pawh telin thu a sawi ve bawk. Mauritius PM Pravind Kumar Jugnauth, Gujarat CM Bhupendra Patel & Union AYUSH Minister Sarbananda Sonowal-te pawhin summit hawnna inkhawm hi an hmanpui bawk a ni.

Covid hripui leng karah, mipuite natna dona tura taksa hriselna ṭha an neih theihna tura AYUSH Kada leh product dange ṭangkaina chu fakin, Modi chuan AYUSH sector puala investment summit hmasa ber a ni chu lawmawm a tih thu a sawi. AYUSH medicine, supplement leh cosmetic siamchhuahte chu pung nasa hle tih sawiin, AYUSH field-a invesntment tihna kawng a inhawng mek a ni, a ti.

Ram hmul damdawi chingtu, loneitute chuan a zawrhchhuahna lam awlsamna turin facility a neih a ngai tih PM chuan a sawi a, sorkar laipui chuan AYUSH e-marketplace tichangtlun a, tihlen zel tumin hma a la mek tih a sawi.