Jahangirpuri area tlawh tura kal Congress team te Police-ten an lo dang

Delhi-a buaina chhuahna leh, North Delhi Municipal Corporation (NDMC) in dan loa thil din nia sawite a tichhiat tirna, Jahangirpuri bial chu nimin khan Congress hruaituten tlawh an tum a, mahse Delhi police-te chuan lo dangin an kal tlang an remti lo.

Congress palai zingah hian union minister hlui AjayMaken leh AICC in-charge of state unit Shaktisinh Gohil-te pawh an tel.

NDMC mayor-in demolition drive nei tura thupek a pek hnuah, Supreme Court-in titawp tura a tih vangin chawlhsan a ni thei ta a ni. Ajay Maken chuan Jahangirpuri biala demolition drive neih mi harsa zawk leh an eizawnnate tihchhiat sakna a ni, tiin he drive kalpui chu dan bawhchhiatna lian tak a ni, a ti bawk.

"Hetianga thil tihchhiatsak hi dan kalh a ni. Urban development minister ka lo ni ve tawh tho a, dan lekkawh a nih theih dante pawh ka hre ve a ni. Hriattirna pe hmasa loin hetiang thil hi an ti ngawt thei lo. BJP hruaitute hian dawt an sawi a ni," tiin Maken chuan a sawi.

Ghil pawhin BJP chu sawiselin, ram chhunga thil man sang chak lutuk avanga mipui lungawi lote rilru hruaipenna atana he thil hi kalpuiah a puh.

Supreme Court-in demolition drive titawp tura thupek a tihchhuah hnuah pawh BJP rorelna, NDMC chuan bulldozer hmanga tihchhiat hna hi a kalpui chhunzawm nia sawi a ni. Party dangte chuan BJP chu na taka sawiselin, sakhaw tlem zawkte bitumah a puh. Hetih lai hian BJP chuan demolition drive kalpui chu dan ang taka thiltihna, sakhaw lam nena inkaihhnawihna nei lo niin a sawi thung.

TMC-in Delhi-ah fact-finding team tirh tum
West Bengal-a rorellai, Trinamool Congress (TMC) chuan Delhi khawpuia buaina chhuak hi chhui chiang a, thil thlen dan dik tak hriatfiah anih theihna turin vawiin hian fact-finding team a tir dawn.

Bengal chief minister, Mamata Banerjee kaihhruai TMC hian Jahangirpuri-a buaina chhuak leh, a hnu demolition drive kalpuiah hian BJP chu mawhphurtuah a puh a ni.

TMC-in Delhi-a team tirh a tum hi, tun hnaia West Bengal-a Birhbum district-a buaina chhuak chungchanga sorkar laipuiin West Bengal state-a member anga awmna, fact finding team a tirh a lo chhan letna anga ngaih a ni.