UK PM Boris Johnson a rawn zin

Britain prime minister Boris Johnson chu ni hnih cham turin nimin khan India ramah a rawn zin.

Boris Johnson hi nimin zing khan Ahmedabad airport-ah rawn ṭumin, Gujarat chief minister Bhupendrabhai Patel leh governor Acharya Devvrat-ten a lo hmuak a ni. UK PM zinga Gujarat tlawh hmasa ber a ni. UK-a British-Indian awm zinga a zahve vel khu Gujarat state chhuak an ni.

Nimin khan Gandhi Ashram tlawhin, British firm JCB-in Gujarat-a factory a siam chu a tlawh nghal a, hei bakak hian University of Edinburgh, Scotland nen thawkduna din biotech university a tlawh nghal bawk. Ahmedabad-ah Adani Group chairman Gautam Adani nen an inkawm bawk a, Adani Group leh Britain company-te thawhdun theih dante an sawidun.

Vawiinah Britain PM Johnson lawmna inkhawm hi Rashtrapati Bhawan-ah buatsaih a ni dawn a, Mahatma Gandhi thlanah pangpar a dah bawk ang. Hemi hnu hian prime minister Narendra Modi-te hian meeting an nei dawn a, Free Trade Agreement (FTA) chungchang leh, ram pahnihte thawhdunna ṭha zawk siamna turte an sawidun dawn a ni. Defence and security bakah trade lamah te thawhdunna lian zawk an siam rin a ni. Ukraine leh Russia indo chungchangte pawh an sawidun rin a ni bawk.

Johnson hian external affairs minister S Jaishankar a hmu dawn bawk a, meeting an neih zawh, chawhnu dar 1 velah Hyderabad House-ah thuchhuah an siam nghal ang.