BJP-in company aṭangin donation dawng hnem ber

Association of Democratic Reform (ADR) report tihchhuah chuan, kum 2019-20 chhung khan national party zingah Bharatiya Janata Party (BJP) chuan corporate leh business house aṭangin party fund atan donation a dawng hnem ber. Indian National Congress (INC) in a dawt a ni.

Kum 2019-20 chhunga corporate leh business house aṭanga national party-te hnena sum pek hi a vaiinRs vbc 921.95 a tling. Heng aṭang hian BJP chuan Rs vbc 720.41 dawngin, INC-in Rs vbc 133.04 a dawng. ADR chuan party-te hnena sum petu lian thamte chu manufacturing, mining, construction leh export lamte an nih thu a tarlang.

BJP hian corporate donor 2,025 hnen aṭangin party fund tur sum ṭhahnem tak hi a dawng a, INC hian corporate leh business donor 154 aṭangin a dawng bawk. National Congress Party (NCP) chuan corporate donor 36 aṭangin Rs vbc 57.09 a dawng ve bawk a ni. National party zinga mi, Communist Party of India (CPI) chuan corporate hnen aṭanga an sum dawn kimchang an tlangzarh lo thung.

Kum 2018-19 chhung khan national party-ten corporate donation an dawn hi Rs vbc 881 a ni a, BJP chu a dawng hnem ber a ni leh bawk.