India ramah Covid-19 kai 4,56,831 enkawl dam tawh

India ramah Covid-19 kai tawh zinga 4,56,831 chu enkawl dam an ni tawh a, enkawl dam rate hi 61.53% a ni tawh a, nitinin hmasawnna hmuh tur a awm. Ministry of Health and Family Welfare-in nimina report a tihchhuahah chuan darkar 24 chhungin hri kai hmuh chhuah thar 22,752 an awm a, hri len ṭantirh aṭanga nimin thleng khan mi 7,42,417-in hripui hi an kai tawh a, enkawl dam ṭhahnem tak awmin mi 2,64,944-in an la kai mek bawk. Darkar 24 chhungin hri kai dama puan 16,883 lai an awm a, thihpui 482 awm leh bawkin a vaiin mi 20,642-in an thihpui tawh a ni. 

Indian Council of Medical Research (ICMR) chuan a vawi eng emaw zatna atan ni khata Covid-19 sample test tam ber ni record an siam leh a, nimina report an tihchhuahah darkar 24 chhungin sample 2,62,679 an test. Hri len ṭantirh aṭanga nimina report an tihchhuah thleng khan sample 1,04,73,711 an test tawh.

ICMR hian Covid-19 sample test-na tur laboratory pawmpui ramchhung hmun hrang hrangah 1,119 a nei tawh a, heng zinga 795 hi sorkar laboratory niin 324 chu private laboratory a ni.

World Health Organization Situation Report aṭanga a lan dan chuan mipui awm zat aṭanga teh chuan India ram chu Covid-19 kai tlem ber ram zingah a tel. India ramah hian mi maktaduai khat zelah 505 velin an kai anga chhut a ni a, khawvel average chu 453 a ni thung.

Chile-ah erawh chuan an tam hle a, mi maktaduai khat zelah 15,459 laiin an kai ang a ni. US-ah chuan 8,500 zelin an kai anga chhut a nih laiin Brazil-ah chuan 7,419 velin an kai ang a ni a, Spain-ah pawh 5,358-in an kai anga chhut a ni bawk.

Hri kai tam ram pathumna ni mek India-ah hian mi maktaduai zel aṭanga vei zat chhut chuan hri kai tam ram zingah a lang lo a ni. WHO Situation Report chuan India chu mi maktaduai zel aṭanga thi zat chhut pawhin Covid-19 vanga thi tlem ram a ni tih a tarlang a, maktaduai khat zela mi 14 an thi angin a chhut. Hetiang a nih lai hain khawvel pum average chu maktaduai zela 68 ang a ni daih thung.