National Hydrogen Mission zawm turin UK kan sawm : PM Modi

Prime minister Narendra Modi leh India rama cham mek, UK prime minister Boris Johnson-te chuan nimin khan Delhi-ah meeting an nei.

Meeting zawhah joint media address an neihah, PM Modi chuan, "COP 26-a kan lo intiam tawhna hrang hrangte tihlawhtling zel tura theihtawp chhuah kan tum thute kan sawi. Climate and energy sector lama thawhdunna thuk zawk neihna turin UK chu India-a National Hydrogen Mission chu zawm turin kan sawm bawk," a ti. 'Azaadi Ka Amrit Mahotsav' (India independence kum 75-na lawmna) laia UK PM-in India ram a tlawh chu thil chhinchhiah tlak tak a nih thu a sawi bawk.

Modi chuan Free Trade Deal chungchang pawh sawiin, hei hi Johnson-a'n India ram a rawn tlawhna chhan pakhat a ni. "Nikum khan India-UK chuan thawhdunna tur hi an siam a, FTA chungchangah pawh hma lak mek a ni. Defence, trade, climate & energy sector lamah pawh inbiakna neih a ni bawk," a ti.

UK PM Boris Johnson pawhin PM Modi nen inbiakna ṭha tak neiin, kawng hrang hrangin ram pahnihte inlaichinna chu tihchak a nih thu a sawi. Diwali-ah Free Trade Agreement chu neih hman nghal an tum tih sawiin, UK National Health Service leh India health service lamah pawh thawhdunna ṭha tak an neih theih a beisei thu a sawi bawk.

Nikum khan Johnson leh Modi-te hian UK-India Comprehensive Strategic Partnership siam an lo remti tawh a, pound maktaduai 530 chuang investment tih bakah trade, health, climate, defence and security bakah mipuite inzawmna ṭha zawk siam tum a nih thu an sawi.

Boris Johnson hi Ningani khan Gujarat-a Ahmedabad airport-ah a rawn ṭum a, state hruaituten ropui takin an lo hmuak a ni. Ningani zan khan Delhi lam pan lehin, union minister Rajeev Chandrasekhar-a'n airport-ah a lo hmuak a ni. Nimin zing khan Rahstrapati Bahwan-ah Johnson lawmna hi buatsaih a ni a, Raj Ghat-a Mahatma Gandhi thlan tlawhin pangpar a dah bawk.