SC-in Maha minister bail dilna a hnawl

Supreme Court chuan Maharashtra minister, National Congress Party (NCP) hruaitu Nawab Malik-a'n Enforcement Directorate-in Prevention of Money Laundering Act (PMLA), 2005 hnuaia an man chungchanga bail-a chhuah a dilna chu nimin khan a hnawlsak.

Malik hi gangster Dawood Ibrahim thawhpui hnaivai nen ram lei chungchangah inzawmna neia puhin February 23 khan man a ni. ED-chuan Malik hian Dawood Ibrahim farnu, Haseena Parkar chu ram lei chungchangah a driver kaltlangin inremna a siampui niin a tarlang. He ram hi misual pawlte hian tihluihna hmanga a neitu dik tak hnen aṭanga an chhuhsak niin, Malik company hnenah an hralh ta niin sawi a ni.

Bombay High Court-ah bail-a chhuah a dilna chu March 15 khan hnawlsak a lo ni tawh a, hemi hnu hian Supreme Court-ah ngenna hi a thlen leh a ni. Mahse Supreme Court-a justice DY Chandrachud leh Surya Kanty awmna bench chuan Bombay High Court order tihchhuahah hian lo inrawlh an tum lo tih a sawi.

Nimina court-a Malik aiawha inlan, senior advocate Kapil Sibal chuan Malik hi kum 1999-a thil thleng chungchangah kum 2022-ah man a ni a, tihsual a neih loh avangin Prevention of Money Laundering Act (PMLA) hnuaiah eng case mah a awm lo bawk tih a sawi.