West Bengal hmun ṭhenkhatah complete lockdown hman tum

West Bengal-a North 24 Parganas district thuneituten Covid-19 hri a darh chhoh zel avangin sorkarah complete lockdown puang turin rawtna an thehlut, hei vang hian West Bengal sorkar chuan hmun ṭhenkhatah lockdown a puang dawn nia sawi a ni. 

North 24 Parganas district-a Bidhannagar, Barasat, Basirhat, Barrackpore leh Bongaon municipal area-te chu hri darh zualna hmun a nih avangin he lai hmuna complete lockdown puan a nih theih nan hian sorkarah rawtna hi an thehlut ta a ni. He district bakah hian West Bengal khawpui Kolkata leh Howrah khuaah pawh lockdown thar hman tumna a awm niin media-te chuan an sawi a, mahse state sorkar chuan lockdown hman hun tur hi a la tichiang lo thung.  

West Bengal-ah hian Covid-19 vanga thi chu mi 804 an awm tawh a, heng zinga mi 22 chu Thawhṭanni khan an thi a, ni khat chhunga he hri vanga thi tam ber ni a ni. Hemi ni vek khan hri kai thar mi 861 hmuh an ni a, nimin thleng khan hri kai zawng zawng hi mi 23,837 an awm tawh a ni. Pathianni khan mi 524 enkawl dam an ni a, anni nen hian an vaiin hri kai enkawl dam hi mi 15,790 an tling tawh a ni.