Kum 3 chhunga a ṭum khatna atan PM-in J&K-ah rally nei

Prime minister Narendra Modi chuan nimin khan Jammu and Kashmir-ah kum thum chhunga a vawi khatna atan rally a nei a, project hrang hrang cheng vaibelchhe 20,000 hu a tlangzarh bawk.

Prime Minister hian Jammu and Kashmir state ṭhen a, union territory pahniha siam a nih hnuah J&K union territory a tlawhna hmasa ber a ni.

Nimin khan National Panchayati Raj Day pualin, Jammu-a Palli khuaah vantlang inkhawm hi buatsaih a ni a, he hunah hian mi tel an ṭhahnem hle. PM chuan, "Kum hnih kum thum liam taah khan Jammu and Kashmir-ah hian thil chhinchhiah tlak tam tak a thleng. Sorkar hmasate khan central scheme-te chu a takin an kalpui lo a, keini erawh chuan kalpui turin kan siam a ni," a ti.

"Kum 60 chhungin he bial tan hian Rs vbc 17,000 chauh hman a ni a, keini erawh chuan kum hnih chhungin Rs vbc 38,000 kan hmang a ni," tiin sorkarna lo siam tawh, National Conference leh People's Democratic Party te chu a bei zui bawk.

BJP-in Mehbooba Mufti kaihhruai, People's Democratic Party (PDP) sorkar an thlawpna an tihtawp hnuah, kum 2018 aṭang khan J&K hi President's Rule hnuaiah a awm.

PM Modi hian Kishtwar-a Chenab luia Rs vbc 5,300 senga siam tur, 850 MW Ratle hydroelectric project lungphum a phum a, he luiah vek Rs vbc 4,500 senga siam tur 540 MW Kwar hydroelectric project lungphum a phum bawk a ni.

Prime Minister-in a tlawh hma lawk, Zirtawpni leh Inrinni khan J&K-ah hian firfiakte pawikhawhna a thleng a, hei vang hian venhimna pawh an tikhauh hle. Zirtapwni khan firfiakten Sunjwan-ah bus beiin, CISF security pakhat an kaphlum a, a hnuah security force-ten Jaish firfiak pahnih an kaphlum ve leh bawk. Inrinni khan Kulgam-ah firfiakte che lehin, security force-ten Jaish firfiak pahnih an kaphlum leh bawk.