Ola-in electric scooter 1,400 chuang la let dawn

Ola Electric chuan eletric two-wheeler a siamchhuah zinga 1,441 chu enfiah turin a la let leh dawn tih a sawi.

March 26 khan Pune-ah Ola electric scooter a kang a, hei vang hian company chuan he scooter ruala siamte chu a khawlte enfiah turin a la let leh vek dawn a ni.

Thuchhuah siamin Ola Electric chuan, "Heng scooter-te hi kan service engineer-te chu ngun takin an endik leh dawn a, battery system leh thermal system zawng zawng ennawn leh vek a ni ang," a ti. An battery system hi European standard ECE136 leh Indian standard AIA 156 pawh a zawm vek tih an tarlang bawk.

Tun hnaia ram chhungah electric two-wheeler puak leh kang a awm leh ṭhin avangin a siamtu lam pawhin ennawn turin an la let leh hlawm a ni. Okinawa Autotech chuan unit 3,000 chuang leh PureEv pawhin unit 2,000 vel ennawn turin an la let tawh bawk.