EU chief von der Leyen a rawn zin

European Commission (EU) president Ursula von der Leyen-i chu India leh EU thawhdunna chak siam dan tur ngaihtuahin nimin khan ni hnih cham turin India ramah a rawn zin. Hei hi EU President a nih hnua India rama a rawn zinna hmasa ber a ni bawk.

External affairs ministry chuan EU President lo zin thu hi puangin, vawiina Raisina Dialogue neih turah khuallian a nih tur thu a sawi.

A cham chhungin von der Leyen hian president Ram Nath Kovind a hmu dawn a, prime minister Narendra Modi nen meeting an nei bawk ang. PM nena an meeting-ah hian climate change leh biodiversity chungchang te, energy leh digital transition, connectivity, security leh defence, leh Indo-Pacific-a thawhdunna lamte an sawidun ang. Hei bakah hian Russia-Ukraine indo mek chungchang pawh an sawidun dawn bawk a ni.

EU President hian The Energy and Resources Institute (TERI) campus, TERI Gram tia sawi chu a tlawh dawn a, International Solar Alliance (ISA)-ah thu sawiin, India leh EU company-te chu energy sector-a supply chain security lam a sawipui bawk ang.

EU hi India rama investor lian ber zinga mi niin, kum 2015-20 chhunga India rama investment zinga 16% chu EU aṭang hian a ni. India ram chhungah hian European company 4,500 awm mekin, heng company-te hian direct-in mi mtakduai 1.5 chuang leh indirect-in mi maktaduai nga te tan hna an siam sak mek bawk.