Kum 10 chhung India mi nuai 17 chuangin HIV kai

National AIDS Control Organisation (NACO)-in RTI zawhna a chhanah, kum 10 liam ta chhungin India ramah invenna telloa mipat hmeichhiatna hman aṭanga HIV (human immunodeficiency virus) kai mi nuai 17 chuang an awm tih a sawi.

Hemi rual hian kum 10 chhunga HIV kai thar hi a hma aiin an tlahniam tih a tarlang nghal bawk.

Madhya Pradesh-ah activist Chandra Sekhar Gaur-a'n RTI zawhna a thehluh a chhannaah, NACO chuan kum 2011-2021 inkara mipat hmeichhiatna hman aṭanga HIV kai hi 17,08,777 an awm thu a sawi. Heng zingah hian Andhra Pradesh-ah HIV kai thar hi tam berin mi 3,18,814 an awm a, Maharashtra-ah mi 2,84,577, Karnataka-ah mi 2,12,982, Tamil Nadu-ah 1,16,536, Uttar Pradesh-ah 1,10,911 leh Gujarat-ah 87,440 an awm a ni.

Thisen inpek leh thisen kaihhnawih aṭanga HIV kai hi kum 10 chhung hian mi 15,782 an awm bawk a, nu-in a fa a kai hi 4,423 an awm bawk.

State leh Union territory zawng zawngah HIV kai thar zat hi an tlahniam tih data chuan a tarlang bawk. Kum 2020 khan India ramah HIV kai hi 23,18,737 awmin, an zingah hian naupang 81,430 an tel.