CBSE-in class 9-12 zir tur 30%-in a titlem

Central Board of Secondary Education (CBSE) chuan academic session 2020-2021 a class 9-12 zirlaite zir tur 30%-in tihtlem a ni dawn tih thuchhuah a siam. 

Zirtur (syllabus) hi tihtlem tum ni mah se subject tina a pawimawh lai bik (core concept) erawh paih a ni dawn lo tih Union Minister for Human Resource Development, Dr. Ramesh Pokhriyal chuan a sawi. Internal Assessment leh kum tina Board Examination-a subject pawimawh chu syllabus tihtlem zingah hian telh a ni loh thu CBSE hian an thuchhuahah hian an tarlang.

Minister Pokhriyal chuan ram chhung hmun hrang hranga educationist hnen aṭanga syllabus titlem tura rawtna a dawn hnem thu sawiin, social media lamah pawh #SyllabusForStudents2020 an hman nasat thu a sawi bawk. Syllabus tihtlem tum a nih chhan hi Covid-19 hri leng vanga zirlai zir zawh a har dawn vang a ni a, April thla khan Delhi deputy chief minister Manish Sisodia pawhin HRD Minister hnenah hian zirlaite tan an zirlai tur chu titlem turin rawtna a lo siam tawh bawk.  

CBSE leh Facebook ṭangkawp chuan zirtirtute tan 'Augmented Reality' an siam a, hei bakah hian zirlaite tan 'Digital Safety and online-wellbeing' tih chu an siam bawk. March 16 aṭang khan Covid-19 hri leng vangin India ram pumah zirna in khar a ni a, July 1-15 chhung khan CBSE zirlaite tan exam buatsaih tum a ni a, mahse hri leng hian ziaawm lam a pan mai loh avangin ṭhulh leh a ni.