Eptu hruaituten EC an hmu Union Budget pharh hun sawn an phut

Eptu party hruaitute chuan nimin khan Election Commission an hmu a, state panga-a assembly inthlan neih hun tur puan a nih hnu lawka sorkar laipuiin union budget pharh a tum chu sawn hla turin an phut.

EC hmutute hi Congress, TMC, Samajwadi Party, BSP, JD(U) leh RJD hruaitute an ni a, nimin chawhma dar 11 khan EC hi hmuin, Union Budget pharh hun tura ruahman chu state inthlan hun tur nen a inhnaihchilh avangin sawn hlat an phut a ni.

Election Commission chuan hemi chungchang hi a lo zirchian tur thu sawiin, thutlukna pawh a siam thuai rin a ni bawk.

Chief Election Commissioner Nasim Zaidi chuan, eptu party hrang hrang aiawhte aṭanga ngenna an hmuh thu hi sawiin, budget pharh hun sawn tura an ngenna pawh an ngaihtuah dawn tih a sawi.

Hetihlai hian Union Finance Minister Arun Jaitley chuan budget pharh hun tura ruahman chu kal tlangpui ngei tur a nih thu a sawi thung. Jaitley chuan, “Party ṭhenkhat chuan pawisa note tih thihin a ṭha zawnga nghawng a neih loh tur thute pawh an lo sawi tawh a, engvangin nge budget pharh hun tur chu an lo buaipui viau ni?” a ti.

Finance Minister chuan kum 2014 Lok Sabha inthlanpui neih hma khan interim budget pharh a ni a, hemi hma pawh hian inthlan hmaa budget pharh a lo nih tawh thu a sawi.

Eptu party-te hian nikum December 14 khan Union Budget pharh hun chu assembly inthlan neih zawh huna sawn tura ngenin, President Pranab Mukherjee leh Election Commission hnenah memorandum an lo thehlut tawh a ni.

BJP thawhpui, Shiv Sena pawhin inthlan zawh hnuah union budget pharh turin a phut bawk. Shiv Sena MP-te hian hemi chungchang sawipui tur hian President pawh hmuh thuai an tum. Shiv Sena President Uddhav Thackeray chuan,”BJP hian dik lo taka thil kalpui a, union budget hmanga mipuite rilru hruaikawi a tum ngei kan ring a ni”, a ti.

Delhi-a rorellai, Aam Aadmi Party pawhin state panga-a vote thlak hma ni thum leka union budget lo pharh chu thil dik lo tak a nih tur thu an sawi bawk.