EC-in sum hman dan vil ṭha dawn

State panga-a assembly inthlan neih hun tur puan a nih hnuah, Election Commission chuan inthlan vuakveta sum hman ral dante ngun takin vil a ni dawn tih a sawi. Sum hman ral dan enfiah tur hian expenditure observer 400 dah a tum a, hengte hi IRS leh central service danga mite an ni ang.

Official-te chuan expenditure observer atan hian Income Tax Department aṭangin mi 200, Central Excise and Custom department aṭangin mi 150 leh midang 50 chu central service dang amite hman a ni dawn tih a sawi.

EC chuan observer-te hi thil hrilhfiah an nih hnuah, an duty-na tur state leh constituency-te pek an ni dawn a ni, a ti. Observer-te hian sum lengvel-te uluk takin an thlitlai ang a, inthlan vuak vetah black money hman a ni em tih te, dan kalha thil tih awmte vengin, Delhi-a EC headquarters nen an inbepawp reng dawn a ni, a ti.

Central Board of Direct Taxes pawhin Air Intelligence Units (AIU) te chu inthlanna tur state-a airport-ah te ngawrh zawka duty turin a ti a, sum leh thil dang, vote zawnna tura atana hmanrua atana hman tur nia rinhlelh lakluh turte ngun taka dap turin a ti. State excise department leh police thuneitute pawh zu leh ruihtheih thil dang siam, zawrh leh chhekkhawl awmte uluk taka dap turin tih an ni bawk.

Assembly inthlan neihna tur zing ami, Uttarakhand-ah chuan political party hrang hrangte hnenah vantlang punkhawmna hmuna an party fakna poster tar te chu la thla vek turin EC chuan a hriattir. Uttarakhand-ah hian a ṭum khatna atan constituency pali-ah VVPAT(Voter-Verified Paper Audit Trail) hman ani dawn a ni.