Sipai tana sum hmang tam zual ram zingah India tel

Stockholm International Peace Research Institute (SIPRI), khawvela ram hrang hrang sipaite sum hman dan zirchiangtu chuan nimina report a tihchhuahah, kum 2021 chhunga sipai tana sum hmang tam ram pathum zingah India a tel thu a tarlang.

SIPRI thuchhuah chuan, kum 2021 chhung khan khawvel puma sipai tana sum hman zat hi a hma kum aiin 0.7% in pungin, USD tluklehdindgawn 2,113 a tling tih a sawi.

Sipaite tana sum hmang tam zual ramte chu - US, China, India, UK leh Russia niin, heng ram pangaten an sipaite tana sum an sen hi khawvel puma sipai tana sum hman aṭanga 62% a tling pha.

Kum 2021 chhunga India-in sipaite tana sum hman hi kum 2020 aiin 0.9% in a tam a, kum 2012-a a sen aiin 33% zetin a pung tawh. Sipaite tana a sum sen hi GDP aṭanga 2.7% a ni pha a ni. Khawvel pumin sipai tana a sum sen hi GDP aṭangin 2.2% a ni bawk.

Hetih lai hian sipaite tana sum seng hnem ber, US chuan kum 2021 chhungin USD tld 801 a hmang a, kum 2020 aiin a sum hman hi 1.4% in a tlem zawk thung. China c huan kum 2022-ah USD tld 293 hmangin, kum 2020 aiin a sum hman hi 4.7% in a pung. Kum 27 chhung chu China-in sipai tana a sum hman hi a la pung chho zel a ni.

SIPRI report chuan kum 2017-21 chhunga India-in ralthuam a hralhchhuah zinga a zahve vel chu Myanmar-ah thawn a ni tih a tarlang bawk. India hi kum nga chhung chu Myanmar rama ralthuam supply-tu lian pathumna a ni pha. Hemi hun chhung vek hian ralthuam a thawnchhuah zinga 25% chu Sri Lanka leh 11% chu Armenia ramah a thawn. Kum 2017-21 chhung hian India leh Saudi Arabia chu ram dang aṭanga ralthuam lalut tam ber niin SIPRI chuan a tarlang bawk.