China mite hnena tourist visa pek titawp

India chuan China mite hnena tourist visa pek ṭhin chu a titawp rih niin global airlines body, International Air Transport Assocation (IATA) chuan a sawi.

He thil hi China-in Chinese university hrang hranga India mi zirlai, 22,000 velte an zirna chhunzawm tumte an rama luh a remti rih loh avanga India-in a chhanletna nia ngaih a ni.

China rama India mi zirlai tam tak chu kum 2020 kumtir lam aṭang khan Covid-19 hri leng avangin India ramah an rawn haw a ni. Mahse heng zirlaite hi China chuan an rama an kir leh a la phalsak lo a, ministry of external affairs (MEA) thupuangtu Arindam Bagchi chuan March 17 khan zirlai sang telte chu an zirna an chhunzawm theih loh avangin an dinhmun buaithlak takah an ding mek a ni, tiin a lo sawi tawh a ni.

Bagchi chuan Indian zirlaite luh phalsak turin China pawh an nawr fo tih a sawi a, February thla khan China foreign ministry thupuangtu chuan hemi chunghang hi an ngaihtuah mek a, China rama ramdang zirlaite an kir leh theihna tur pawh ruahmanna siam a nih tur thu a sawi a ni, a ti. "Mahse tun t hlengin China lam chuan India zirlaite kir leh theih dan hi engmah a la sawichiang lo a ni. Zirlaiten an zirlai an chhunzawm leh thuai theihna turin China lam pawh kan nawr chhunzawm zel ang," a ti.

Nikum September thlaa Dushanbe-a external affairs minister S Jaishankar leh China foreign minister Wang Yi ten meeting an neih ṭum pawh khan Indian zirlaite harsatna tawh chungchang hi an lo sawidun tawh bawk.