Spicejet-in dollar tld 10.1 man Boeing lei dawn

SpiceJet chuan Boeing Co.737 jetliner 92 lei a tum a, hun rei loteah inremna an ziah­fel thuai rin a ni. Thlawhtheihna a lei thar tur hi dollar tluklehdingawn 10.1 man a ni.

SpiceJet hian thlawhtheihna 40 a nei mek a, hengte hi Boeing 737 jet 26 leh, Bombardier Q400 tubroprops 14 an ni a, a order thar hi a neih zat let zeta tam a ni. Thlawhtheihna a lei thar tur zinga 42 hi kum 2014-a a lo order tawh, inbiakna an neih ṭhat hnuah an tihthar leh a ni.

Order hi tihfel a nih chuan SpiceJet tan record a tling dawn a ni. Kum hnih kalta khan sum lam indaih lohna avang­in SpiceJet hian ni khat chhung chu thlawhtheihna te a lo dintir vek tawh a ni. Mahse tuna an chairman ni lai leh co-founder ni bawk, Ajay Singh chuan an leibatna aṭang hian a khai chhuak a ni. Ningani khan Mumbai-ah SpiceJet shar hi 4.6% in a sang chho bawk.

SpiceJet elpui ber leh a la phak loh, IndiGo chuan kum 2015 khan Aurbust A320neo jet a order a, hemi hma kum 2006 khan A320 thlawhtheihna 100 leh 2011-ah A320neos 180 a lo order tawh bawk. IndiGo hian tunah thlawhtheihna120 a nei mek a ni.

India ram hi airlines tan a hautak a, fuel tax a san bakah, a chuan man a tlawm avangin tam takin an hlawhchham pui a ni. Kum sawmhnih kalta chhung khan airlines 17 chu tihtawp a ni tih Associated Chambers of Commerce and Industry of India chuan a sawi.