Kejriwal man theih nan sorkarin CBI hmanruaah a hmang: Sisodia

Delhi Deputy Chief Minister Manish Sisodia chuan, Delhi Chief Minister leh Aam Aadmi Party (AAP) hotu Arvind Kejriwal-a chu man a nih theih nan sorkar laipui chuan Central Bureau of Investigation (CBI) chu dik lo takin hmanruaah a hmang a ni, a ti.

Sisodia chuan kum 2015 December thlaa Kejiwal-a office dap a nih hnu leh, nikum December thlaa Delhi Health Minister Satyendar Jain-a office an dap hnuah, CBI chuan ama office ngei pawh dap leh tumin an inbuatsaih mek niin a sawi.

Kejriwal-a Principal Secretary hlui, Rajendar Kumar-a’n Delhi Chief Secretary hnena lehkha a thawn chungchang pawh sawichhuakin, Sisodia chuan CBI chuan thu an zawhfiah laiin Kumar chu nasa taka nawrin, a fihlim theih nan Kejriwal-a chu dik lo taka puh turin an nawr a ni, a ti. CBI-te hian CM office dap a, Kejriwal-a an man theih nan Kumar chu Kejriwal-a thiam loh chantir turin an duh a ni, tiin Sisodia chuan a sawi.

Sorkar official, BK Bansak leh a chhungte an intihhlum chhan pawh CBI mi leh sate vang niin a sawi bawk.

Sisodia chuan CBI chu eiru leh dik lo taka thilti leh firfiakte lam buaipui lo a, CM Kejriwal-a an man theihna tur ringawt buaipuiah a puh. PM Modi chu a duh anga che tura choin, officer, MLA leh minister te man tura CBI chu chhawr turin a ti a, mahse a hun a liam hnai tawh niin a sawi. Assembly inthlan neihna tur, Punjab, Uttar Pradesh leh state dangte chuan PM chu zirtirna an pe dawn a ni, a ti.