TMC MP-te’n PM Office-ah lungawi lohna lantir

Trinamool Congress MP-te chuan pawisa note tih thih chungchangah leh, an party mi leh sate chunga politics phuba laah puhin, Prime Minister Narendra Modi-a kaihhruai sorkar lakah lungawi lohna an lantir a, Ningani khan PM Office kawtah kawng an zawh.

TMC MP-te’n kawng zawh an tum tih hi hriat lawk a nih loh avangin police lam pawh an inring hman lo a, kawngzawhte hian duty chhawng hnih chu an paltlang hman a ni. MP 30 vel chu man an ni a, mahse darkar thum hnuah chhuah leh vek an ni.

TMC MP Sudip Bandyopadhyay chu, Rose Valley-in depositor sum tam tham tak a tihchingpen chungchanga inhnamhnawihah puhin CBI chuan an man a, mahse hei hi an party chuan sorkar laipuiin politics lama phuba lak a tumna hmanrua niin an sawi thung. Rose Valley chit fund-ah hian union minister leh Bengal BJP MP Babul Supriyo pawh a inrawlh niin TMC chuan an sawi.