Kum 6-12 inkarte pek turin Covaxin pawm

Drugs Controller General of India (DCGI)chuan nimin khan naupang kum 6-12 inkarte hnena Covid-19 vaccine pek turin, Bharat Biotech siam, Covaxin a pawm.

DCGI chuan vaccine siamtu hnenah hian an vaccine siam safety data chu thehlut turin a hriattir a, thla hnih chhung chu ni 15 danah zirchian ṭhin a ni ang. Thla hnih hnuah Bharat Biotech chu thla nga chhung, thla tin data thehlut tur hian hrilh a ni bawk.

Kum 2021, December 24 khan DCGI hian kum 12-18 inkarte hnena pek turin Covaxin hi a lo pawm tawh bawk a ni. Kum 5-12 inkar tan Corbevax chu pawm a lo ni tawh bawk a, kum 12-14 inkar vaccine pek mekte chu Corbevax hi pek an ni.

India rama nikum January 16 aṭang khan Covid vaccine hi pek chhuah ṭan niin, a hmasa berah healthcare worker-te pek an ni. Hemi kum February 2 aṭangin frontline worker-te pek an ni ve leh.

Kum 2021, March 1 aṭangin kum 60 chunglamte bakah kum 45 chin, natna benvawn neite hnenah vaccine hi pek ni ve lehin, nikum April 1 aṭangin kum 45 chunglamte pek an ni. Vaccine pek hi huam zau zelin, nikum may 1 aṭangin kum 18 chunglam pek an ni a, kumin January 3 aṭang khan tleirawl kum 15-18 inkar leh March 16 aṭangin kum 12 chinte pek an ni ve leh a ni.

Kumin January 10 aṭang khan booster dose, precaution dose tia sawi chu healthcare leh frontline worker-te bakah kum 60 chin, natna benvawn neite pek an ni a, April 10 aṭang khan kum 18 chunglamte chu private vaccinational centre-ah precaution dose hi an lak phalsak an ni bawk.

Union health ministry-in data a tihchhuahah, nimin zing dar 8 thleng khan ram pumah mi vaibelchhe 187 chuangin Covid-19 vaccine hi an la tawh. Kum 15-18 inkar zingah vaibelchhe 2.70 chuangin vaccine dose khatna an la tawh a, precaution dose la hi kum 18-59 inkarah mi nuai 4.68 an awm tawh bawk a ni.