ED-in ABG Shipyard nena inzawmna nei hmun 26 a dap

Enforcement Directorate (ED) chuan bank loan Rs vbc 22,842 tichingpena puh a chhui mek, ABG Shipyard Ltd nena inzawmna nei, Mumbai, Pune leh Surat-a hmun hrang hrangte chu nimin khan a dap.

Official-te chuan Prevention of Money Laundering Act (PMLA) hnuaiah heng khawpui pathuma hmun 26 dap a nih thu an sawi.

Central Bureau of Investigation (CBI) in ABG Shipyard Ltd promoter hluite laka FIR a thehlut a zirchian hnuah, ED hian February thla khan lawng satu company lakah hian money laundering case a ziaklut tawh a ni. CBI hian ABG Shipyard Ltd leh bank 28-te hnen aṭanga loan, Rs vbc 22,842 an lak laia an chairman leh managing director Rishi Kamlesh Agarwal-te chu thubuai a lo siamsak tawh bawk a ni.

CBI hian ABG chu ICICI kaihhruai bank 28 intelkhawmte buma Rs vbc 22,842 tihchingpen sakah a puh. ICICI hian hloh hnem berin loan hi Rs vbc 7,089 an pe a, IDBI Bank-in Rs vbc 3,639, State Bank of India-in Rs vbc 2,925, Bank of Baroda-in Rs 1,614 leh Punjab National Bank-in Rs vbc 1,244 an pe niin Hindustan Times report chuan a tarlang.