Fuel-a VAT lak tihniam turin state-te ngen

Prime minister Narendra Modi chuan nimin khan state hrang hrangte chu sorkar laipui an thawhpuina turin fuel-a Value Added Tax (VAT) an lakte tihniam turin a ngen.

Khawpui hrang hranga fuel man zat tarlangin, PM Modi chuan VAT hniamna state-ah chuan fuel man hi a tlawm zel a ni, a ti. Ram danpuia thawhhona a tarlan angin, Covid hri leng dona kawngah pawh hun rei tak thawhhona ṭha tak an nei a, tunah economic chungchangah pawh thawhhona ṭha an neih leh a ngai a ni, a ti.

Nikum November thla khan sorkar laipui chuan mipuite phurrit chhawkna atan petrol leh diesel man a tihniam a, state-te pawh an chhiah lak hi tihniam ve tura an ngen nghal thu PM chuan a sawi. State ṭhenkhat chuan VAT hi tihniam vein, ṭhenkhat erawh chuan an ti danglam duh lo a, hei hi mipuite chunga rorelna dik lo tak a nih bakah, an ṭhenawm state thleng pawhin a nghawng a ni, tiin a sawi.

Sorkar laipuiin chhiah a hmuh aṭanga 42% chu state-te hnenah pek a nih tih Modi chuan a sawi a, hei vang hian Chief Minister-te chu an state-a fuel tax an lak chu tihniam a, mipuite phurrit chhawk sak turin a ngen.