PM Modi-a'n CM-te Covid Review Meeting neihpui

Hun eng emaw chen India rama Covid-19 hri lengin ziaawm lam a pan hnuah, kar hnih liam ta aṭang khan hri kai an pung chho leh ṭan. Hei vang hian nimin khan prime minister Narendra Modi chuan video conference kaltlangin chief minister-te chu review meeting a neihpui.

Virtual meeting hi nimin chhun dar 12 khan neih a ni a, union home minister Amit Shah, union health minister Mansuk Mandaviya bakah Prime Minister Office-a senior official leh ministry hrang hrang aiawhte an tel bawk. CM eng emaw zat telin an zingah West Bengal chief minister Mamata Banerjee, Chattisgarh chief Bhupesh Baghel leh Punjab chief minister Bhagwant Mann-te pawh an tel.

Health secretary Rajesh Bhushan chuan ram chhunga Covid hri leng mek dinhmunte sawiin, vaccine pek chhuah dan te, leh booster dose pek hna kalpui mek a nih dante a sawifiah.

PM Modi hian hri leng vang hian a hmain chief minister-te hi meeting ṭum eng emaw zat a lo neihpui tawh a ni.

Modi chuan ram dang nena khaikhinin India rama Covid hri leng do hna chu ṭha taka kalpui a ni a, mahse tun hnaiah state ṭhenkhata hri kai an pun thar leh vangin fimkhur lehzual a ngai leh a ni, a ti. Covid vaccine la thei chinte hnena a rang thei anga pek zel chu sorkarin a ngaih pawimawh tak a ni tiin, school-ah-te pawh special programme buatsaih a la ṭul dawn a ni, a ti.

Thawhlehni khan ram pumah Covid-19 hri kai thar mi 2,927 awm belhin, hri kai hmuh chhuah hi mi 4,30,65,496 an awm tawh. Active case pawh 16,279-ah a kai chho leh tawh a, hri kai tawh aṭangin 0.04% an ni. Hemi ni vek hian hri vanga thi mi 32 awmin, India rama Covid hri vanga thi chhinchhiah hi 5,23,654 an tling tawh.

Delhi khawpuiah Thawhlehni khan hri kai thar 1,204 awmin hri vanga thi pakhat a awm bawk. Delhi-ah hian a zawnin ni nga chhung chu hri kai thar hi 1,000 chuang an awm tawh a, active case pawh 4,508 an awm leh tawh a, mahse an zinga a tam ber chu in lamah inenkawlin, damdawi-ina enkawl hi 114 chauh an awm thung.