Kum naupang lutukin school kal tir tur an ni lo : SC

Supreme Court chuan naupangte chu an rilru hriselna lam ngai pawimawh a ṭul thu sawiin, kum naupang lutukin school kal tir tur an ni lo tiin nimin khan a sawi.

Kendriya Vidyalaya-in academic session thar aṭanga Class 1 lut thei kum 6 china a bithliah chungchang chu duh loin, nu leh pa ṭhenkhatin Supreme Court-ah hian petition an thehlut a ni. A hmain admission ti thei chin hi kum 5-ah bithliah a ni ṭhin.

Nimin khan justice Sanjay Kishan Kaul leh MM Sundresh awmna bench chuan petition thehluh hi ngaihtuahin, kum 6 china bithliah hi zirchianna chuan naupangte tana school kal ṭan kum dik a ni tih an lo tarlang tawh niin an sawi. Bench chuan nu leh pate chu an fate nawr nasa lo tura tiin, an zirna kawngah leh an rilru thlengin nghawng ṭha lo a nei thei a ni, a ti.

Bench chuan, "Nu leh pa tinte chuan an fa chu mi danglam leh thiam bik, eng kumah pawh inzir thei nia an ngaihna hi a buaithlakna a ni. Naupang leh a rilru lam chu ngaihtuahsak zawk rawh u. Thil engkim bulṭanna kum dik hi a awm a, school kal ṭan kum pawh a awm," tiin a sawi.