Puducherry Lt. Gov aṭangin Kiran Bedi a bang dawn

Puducherry-a Congress kaihhruai sorkar nena an inkar boruak a ṭhat loh avangin, Puducherry Lieutenant Governor Kiran Bedi chuan Lieutenant Governor nihna a chelh aṭanga kum hnih a tlinna, nakkum May thlaah ban a tum tih a puang.

Bedi chuan, “Puducherry-a kum hnih ka awm tlinna tur, kum 2018 May 29 khian ka bang dawn a ni” a ti.

Kiran Bedi-i’n a ban hun tur a puan hma hian, Congress MLA-te chuan sorkar laipui hnenah complaint theh­lutin, Chief Minister V.Narayanasamy-a’n thuchhuah a siam tawh a cancel sak chung­changa an lungawi loh thu an thlen a ni. Kar kalta Ningani khan Bedi-o hian CM-in thuchhuah a siam, official thuchhuah siamna atana social media application, Facebook leh WhatsApp te hman a khapna chu a pawm loh thu a puang a ni. Hei hi a twitter-ah tarlangin, Puducherry chuan hma sawn zel a duh a nih chuan, inbiakpawhna hmanrua hman chung­changah khuahkhirhna a siam thei a ni tiin, CM thuchhuah chu cancel a nih thu a sawi.

CM hian December 2 khan thu­chhuah hi siamin, sorkar hnathawkte chu official thilte puanzar leh inbiakpawhna atan social media lam hmang lo turin a ti a, social media hman larte chu an India ram pawnah an server-te a awm vangin hmang lo turin a ti a ni.