Jan 31-ah Parliament budget session ṭan dawn

Central-a BJP kaihhruai NDA sorkar chuan kumina Parliament budget session neih hun tur chu a sawn hma a, January 31-ah Budget session ṭan a ni anga, sessionṭan tukah Union Budget pawh pharh nghal tum a ni.

January 31 khian Rajya Sabha leh Lok Sabha-te’n joint session an nei ang a, President Pranab Mukherjee-a’n thu a sawi ang. Hemi ni vek hian economic survey pharh a ni ang. Budget session hi April 12 ah tihtawp a ni ang.

Kumin aṭang hian a hrana railway budget pharh ṭhin chu tihtawp a ni dawn bawk a, union budget-ah telh nghal a ni tawh dawn a ni.

Lok Sabha Secretariat chuan Standing Committee-te’n Ministry leh Deparment hrang hrangte Demands for Grants-te an ngaihtuah a, Report an buatsaihna turin House rorel inkhawm hi February 9, 2017-ah tihtawp a ni ang a, March 9, 2017-ah rorel chhunzawm leh a ni ang, a ti.

Hetihlai hian eptu party-te chuan state panga-ah assembly inthlan neih a nih dawn avangin, sorkar laipui chuan budget pharh tur hi inthlanna tur state-a vote zawnna remchangah a hmang thei tih sawiin, budget pharh hun hi sawn turin an phut. Election Commission hnenah pawh petition thehlutin, Cabinet Secretary PK Sinha hnenah sorkar chhanna pe turin a hriattir a ni.