National Human Rights Commission-in Chhattisgarh sorkar hriattirna pe

National Human Rights Commission chuan kar kalta Inrinni khan Chhattisgarh sorkar hnenah hriattirna pein, hmeichhe 16-te’n an state police mi leh sate lak aṭangin pawngsual leh kutthlak an tuar tih a hrilh. He pawikhawina thlengah hian state sorkar chuan mawhphurhna lian tak a nei tiin, mihring dikna chanvo palzutna lian tak a ni, a ti.

NHRC chuan FIR thehluh leh material dang awmte a zirchian hnuah, police lakah complaint thehluttu mi 34 an awm tih a sawi. Mahse heng zinga mi 15-te complaint thehluh chauh chu magistrate-in a record a, midang 19-te statement chu magistrate hnenah thehlut turin Chhattisgarh Additional Director of Police (CID) hrilh a ni bawk.

NHRC team chuan police-te kut tuartute complaint thehluh chungchangah hian mi hrang hrang a kawmkual a, security lam bakah kut tuartute ngei pawh thu a zawt kual a ni. Team chuan FIR-a lang mi 34 zinga mi 14-te statement an la a ni. FIR-a lang hmeichhiate hi an vaiin tribal an ni a, kut tuartute hnenah hian zangnadawmna engmah pek a ni lo bawk niin a sawi.