PM Modi-a'n CM-te meeting a neihpui
Prime minister Narendra Modi chuan nimin khan Covid-19 hri leng chungchanga hma lak dan tur leh, vaccine sem buaipui dan turte sawipuiin video conference kaltlangin chief minister-te meeting a neihpui.
Covid-19 chungchang sawia PM hoa meeting-naah hian hri leng hluar zualna state pariat, Rajasthan chief minister Ashok Gehlot, West Bengal CM Mamata Banerjee, Maharashtra CM Uddhav Thackeray, Chhattisgarh CM Bhupesh Bqaghel, Delhi CM Arvind Kejriwal leh Gujarat CM Vijay Rupani te an tel a, union home minister Amit Shah leh health minister Harsh Vardhan-ten an telpui bawk.
Meeting-ah hian Delhi CM Kejriwal chuan Delhi-ah Covid-19 hri leng thawh thumna a thlen mekna chhan pakhat chu boruak bawlhhlawh vang a ni tih a sawi. Kejriwal chuan an ṭhenawm state-a thlai ro halna khu avangin Delhi boruak bawlhhlawh a nasat thu sawiin, hemi tihbo a nih theihna tura pui turin PM hi a sawm nghal bawk. CM chuan Delhi-a hri kaite enkawlna turin sorkar hospital-ah ICU hum 1,000 dah belh turin PM hi a ngen bawk a ni.
West Bengal CM Banerjee chuan an state-a hri leng dinhmun te, Covid kai enkawlna man leh, hri kai thar an tlakhniam thute a sawi a, hemi rual hian PM hnenah sorkar laipuiin state eng emaw zat hnena Good and Services Tax (GST) ba a la pek loh thu a hrilh nghal a ni.
Maharashtra CM Thackeray chuan an state chuan coronavirus vaccine mumal taka sem chhuah a nih theih dan tur leh vaccination programme buaipuitu tur task force a din thu a sawi.
PM Modi chuan state hrang hrangte chu coronavirus vaccine dahṭhatna tur cold storage facility siam hna thawk ṭan turin a hrilh. Covid vaccine progamme buaipui turin district/block level task force din turin state tinte a hrilh. Modi chuan Covid-19 vaccine chu ram mipuiten an dawng vek dawn tih sawiin, a him tawk tur thu a sawi bawk. Vaccine sem chhuah dan tur hi state sorkar-te nena ruahman a ngai dawn a ni, a ti.
Modi chuan hri kai dam leh, recovery rate a ṭhat avangin mi tam tak chuan he hri hi a chak loin, an kai a nih pawhin an dam leh vat turah an ngai a, hei vang hian an inthlahdah phah a ni, a ti. Mipuite chu fimkhur tura ngen nawn lehin, hri darh tur venna atana theihtawp chhuah chu ngaih pawimawh a ṭul thu a sawi. Hri kai hmuh chhuah thar, positive rate chu 5% hnuaia awm tura ṭan lak zel a ṭul thu a sawi bawk.