HP-a khaw pakhata chengten hri kai vek
Himachal Pradesh-a Lahaul-Spiti ditrict chhunga thingtlang khaw pakhat Thorang village khaw puma miten Covid-19 an kai tih hriat a ni. Hei vang hian state sorkar chuan district pali-ah zan lam curfew a puang nghal.
Hri kai thar leh hri vanga thi an pun belh zel avangin sorkar chuan zan lam curfew a puan bakah, veivahna leh punkhawmna lamah khuahkhirhna khauh zawk a siam a, December 15 thleng hman a ni ang.
Outdoor function-ah mi 200 aia tam punkhawm khap a ni a, heng hmunah pawh hian social distancing dan khauh taka kengkawh turin tih a ni. Pawn chhuahnaa hmaituamna hmang lo chu Rs 1,000 zel chawitir an ni dawn bawk. Municipal corporation palia inthlan neih tur pawh nakkum March-April a neih tura sawn a ni.
Himachal Pradesh hi November thla chhunga hri kai pun chakna state panga zingah a tel a, tun thla chhunga hri kai punna hi 143% a tling pha. Hri kai an pun chak em avangin sorkar laipui chuan expert team pawh a lo tir tawh a ni.