Parliamentary Panel-in RBI hotu ko

Sorkar laipuiin Rs 500 leh Rs 1,000 note a tih thih chungchang chhui leh zirchiangtu, Parliamentary committee chuan Reserve Bank of India governor, Urjit Patel chu committee hmaah January 20 a inlan turin a ko.

Public Accounts Committee (PAC) chuan central bank hotu chu an hmaa inlan a, pawisa note tih thih chungchanga thutlukna siam a nih dan te, ram economy lama a nghawng dante chipchiar taka sawifiah turin an ti niin, PAC Chairman leh Congress party senior member ni bawk KV Thomas chuan a sawi.

Pawisa note tih thih a nih hnua a thlakna tur pawisa note thar indaih lohna liantak awm chhan te, pawisa note hlui deposit chungchanga khuahkhirhna siam te, bank leh ATM-ah hun rei tak tak intlar a ngaih vangtein eptu lamte chuan RBI hotu leh sorkar laipui chu nasa takin an lo sawi­sel tawh a ni.

PAC chuan pawisa note tih thih a nih hnua bank-a pawisa dahluh zat kimchang te, black money eng zat chiah nge dawn a nih tawh tih te, pawisa note thar eng zat nge tichhuah tihte sawi turin an ti. Thomas chuan governor hnenah hian cashless transaction kalpui chungchanga sorkar inbuatsaih dante sawifiah turin an zawt bawk dawn niin a sawi.

Thomas chuan RBI governor hi December thla khan koh an tum tawh niin a sawi a, mahse Prime Minister-in ni 50 hun pe tura a ngen avang­in January thlaa koh turin an ti leh ta zawk tih a sawi bawk.

PAC hian RBI governor bakah finance ministry official-te pawh an ko bawk a, revenue secretary leh finance secretary pawh an ko niin, Thomas chuan a sawi.