AAP-in pawisa a nei lo: Kejriwal

Delhi Chief Minister leh Aam Aadmi Party (AAP) national convenor, Arvind Kejriwal-a chuan, Punjab leh Goa-a assembly inthlan neih turah an party chuan pawisa an nei lo tih a sawi.

Pathianni-a Mapusa-a public meeting neihnaah he thu hi sawiin, Kejriwal-a chuan, “Punbaj leh Goa-a inthlan neih turah hian kan party chuan pawisa pakhat pawh kan nei lo a, kan bank account pawh a ruak vek a ni” a ti. Delhi-ah AAP chuan kum hnih sorkarna an siam tawh tih sawiin, duh ni se chuan sum pawh tam tak lalut thei an nih thu a sawi a, mahse kum hnih hnuah pawh inthlanaa chuh turin sum an nei lo tih a sawi.

BJP, Congress leh MGP-te chu na taka bei let zuiin, heng party-te hun chu a liam mek tih AAP hotu chuan a sawi. “Tun ṭum inthlanah hian AAP chuan Goa-a seat awm zat, seat 40 aṭangin seat 28-32 kan la dawn a ni”, a ti.

AAP leh party dangte inan lohna chiang tak a awm thu sawiin, Kejriwal-a chuan AAP chu political party thianghlim niin, party dang­te chu an eiru vek tih a sawi. Politics lama an hmelma, BJP ngei pawhin AAP hruaitute chu eirukna laka fihlim an ni tih an pawm niin, Kejriwal-a chuan a sawi bawk.