Petrol pump-te’n Jan 13 aṭangin credit/debit card dawng dawn lo

Ramchhunga petrol pump-te chuan January 13 aṭangin customer-te hnen aṭangin credit leh debit card an dawng thei tawh dawn lo. Hei hi bank-te’n card payment an dawnin, customer ni loa petrol pump neitute hnenah transaction charge, Merchant Discount Rate (MDR) an siam vang a ni.

Nikum November 8-a sorkar laipuiin pawisa note a tih thih hnu khan, petrol pump-te hian cashless transaction kalpui uar a nih theihnan credit/debit card payment bikah MDR hi a titawp a, hei hi petrol pump aṭanga fuel leinaah pawh hman tel a ni.

Mahse December 31 aṭang khan bank chuan MDR hi petrol pump neitute hnenah chawitir turin a rel a ni. Hei hi petrol pump owners association chuan duh loin, card payment hi an dawng tawh dawn lo tih an sawi. Nimin aṭang khan card payment hi tihtawp an tum a, mahse bank-te’n an tluktlukna siam kalpui hun tur an sawn avangin petrol pump neitute pawhin card dawn theih hun hi an pawtsei ve leh a ni.

Petrol pump owners association chuan, credit card transaction-ah HDFC Bank chuan 1% zel a charge dawn tih an sawi a, debit card transaction-ah 0.25 leh 1% charge a tum bawk niin an sawi. All India Petroleum Dealers Association President Ajay Bansal chuan, bank hian December 16, 2016-a RBI thuchhuah beh­chhanin bank hian thu­tlukna hi an siam tih an sawi, niin a tarlang.