SP buaina zual zel, party symbol neitu nih inchuh

Uttar Pradesh-a rorellai, Samajwadi Party chhunga buaina chuan ziaawm lam pan loin a zual zel.

Assembly inthlan hmachhawn mai tur, Uttar Pradesh-a rorel lai SP-ah hian party hotu lu ber, Mulayam Singh Yadav leh a fapa, Chief Minister Akhilesh Yadav-a te inkarah buaina awmin, an party buaina chinfel dan kawng zawngin theihtawp chhuah mah se an inrem thei lo a ni.

Party aṭanga hnawhchhuah tawh, SP member hlun Amar Singh chuan Mulayam Singh a thlawp a, hetihlai hian Mulayam-a laichin, Ramk Gopal chuan Akhilesh-a lam a thlawp thung. Pawl pahnihte hian assembly inthlan an hmachhawn turah an party symbol hman tumin an inchuh mek a ni.

Nimin khan Mulayam-a lamṭangte chuan Election Commission official-te hmuh an tum a, an party symbol changtu nih tumin an bei mek a ni.

CM Akhilesh Yadav-a chuan December 25 khan assembly inthlan neih tura party candidate list chu party hotu, Mulayam Singh Yadav-a hnenah a thehlut a, mahse Mulayam chuan a list thehlut hi hnawlin, December 28 khan a hranin party candidate list hi a tichhuak ve leh bawk. Hemi hnu hian Mulayam chuan EC hnenah an party hotu a nih thu leh, party symbol pawh changtu tur an nih thu a thlen zui a ni.