Delhi-ah darkar tinin Covid-19 vangin mi 5 thi
Union health ministry tarlan danin Delhi-ah Pathianni khan Covid-19 vanga thi darkar tinin mi panga awm ziah ang a ni.
Pathianni khan Delhi-a Covid-19 hri kai hmuh chuah thar mi 6,746 an awm a, positive rate hi 12.29% a ni. He hri vanga thi chu mi 121 an awm leh a, anni nen hian Delhi-a Covid-19 vanga thi tawh zawng zawng hi mi 8,391 an tling tawh.
Pathianni kha Delhi-a Covid-19 vanga nitina thi mi 100 chuang an awm ziahna ni 11-na a ni. Kar liam ta Inrinni khan mi 111 an thi a, Zirtawpni khan 118 an awm bawk. November 18 khan 131 an awm a, hei hi Delhi-a Covid-19 vanga thi tam ber ni a ni.
Delhi-a Covid-19 hri kai tawh zawng zawng hi mi 5,29,863 an awm a, heng zinga mi 4,81,260 chu enkawl dam an ni tawh thung.