Covid-19 kai 2,27,756 enkawl dam tawh Hri kai hmuh chhuah thar tam ber ni a thleng leh

India ramah Covid-19 hripui kai enkawl dam 2,27,756 an awm tawh laiin a zawna ni lina turin hri kai hmuh chhuah thar tam ber ni a thleng leh a ni.

Nimin thleng khan hri kai mi 2,27,756 chu enkawl dam an ni tawh a, enkawl dam rate pawh hi a sang tawh hle a 55.48% lai ni tawhin enkawl dam rate san ni ber a thleng leh. Ram pumah hri kai 4,10,461 an awm tawh a, a ṭum khatna atan nuai 4 a kai ta a, hetihlai hian enkawl dam hi a tam zawk an ni tawh a, hri kai mek 1,69,451 an la awm bawk.

Mi 13,254-in an thihpui tawh a, India ram chu hripui kai tam berna ram palina a la ni mek bawk a ni.

Indian Council of Medical Research (ICMR) chuan ni khatah Covid-19 sample 1,90,730 an test tawh tih tarlangin hri len ṭantirh aṭang khan sample 68,07,226 an test tling tawh.

India ram chhunga hri leng hluarna ber Maharashtra-ah chuan hri kai 1,28,205 an awm tawh a, enkawl dam 64,153 awm tawhin hri kai mek 58,068 an la awm a; mi 5,984-in an thihpui tawh bawk.

Maharashtra-ah hian darkar 24 chhungin hri kai hmuh chhuah thar 3,874 an awm a, enkawl dam 1,380 awm belhin thihpui 91 an awm leh a ni.

Tamil Nadu-ah chuan hri kai 56,845 an awm tawh laiin enkawl dam 31,316 an awm tawh a, mi 704-in an thihpui tawh thung.

Delhi-ah hri leng a la hluar zel a, Tamil Nadu an hnaih tawh hle. Nimin thleng khan hri kai 56,746 an awm tawh a, kai hmuh chhuah thar 3,630 awmin mi 2,112 laiin an thihpui tawh a ni. Enkawl dam 31,294 an awm tawh a, hri kai mek 23,340 an la awm a ni. 

Ministry of Health and Family Welfare chuan nimina report an tihchhuahah darkar 24 chhungin hri kai hmuh chhuah thar 15,413 an awm leh tih tarlangin a zawnin ni li chhung hri kai hmuh chhuah tam ber ni a thleng tawh a ni. 

Report an tihchhuah hma darkar 24 chhung hian mi 13,925 lai chu enkawl dam an ni ve bawk a, thihpui 306 an awm belh leh bawk.